ईपीएफओचे पेन्शन वजावटीस पात्र पैसा झाला मोठा सीए प्रफुल्ल छाजेड १ चालू आर्थिक वर्षासाठी घरभाड्यासंबंधी नियमांत काही बदल झाला आहे काय? माझ्या मालकीचे बदलापूर येथे एकूण तीन फ्लॅट असून त्यातील दोन फ्लॅट मी भाड्याने दिले आहेत. (तिसऱ्या फ्लॅटमध्ये मी वास्तव्यास आहे) यातील एका फ्लॅटच्या भाड्यापोटी मला १५ हजार तर अन्य फ्लॅटच्या भाड्यापोटी आठ हजार रुपये भाडे मिळते. चालू वर्षात यासंबंधी काही बदल झाला असल्याचे समजते. या दोन्ही फ्लॅटच्या भाड्याचे उत्पन्न मला विवरणपत्रात दाखवणे आवश्यक आहे काय? जास्तीत जास्त किती रुपयांचे वार्षिक भाडे करमुक्त असते? कृपया मार्गदर्शन करावे. एक वाचक तुम्ही तीनपैकी दोन फ्लॅट भाड्याने दिले असल्यामुळे भाड्याचे उत्पन्न विवरणपत्रामध्ये दाखवणे आवश्यक आहे. प्राप्तिकर कायद्यांतर्गत तुमच्या दोन्ही फ्लॅटच्या निव्वळ वार्षिक भाड्याच्या रकमेच्या ३० टक्के भाडे हे करमुक्त ठरेल. चालू आर्थिक वर्षामध्ये झालेल्या बदलानुसार तीन फ्लॅटची मालकी असणाऱ्या व्यक्तीने एक फ्लॅट भाड्याने दिला असेल व एक फ्लॅट वास्तव्यासाठी वापरण्यात येत असेल व तिसरा फ्लॅट काही कारणास्तव भाड्याने दिला नसेल तर त्याचे कल्पित भाडे (नोशनल रेंट) प्राप्तिकर विवरणपत्रात दाखवण्याची आवश्यकता नाही. २ मी एक ज्येष्ठ नागरिक असून माझे वार्षिक उत्पन्न पाच लाख रुपयांपेक्षा किंचित अधिक आहे. ईपीएफओकडून मिळणारे पेन्शन हे प्रमाणित वजावटीसाठी पात्र असते काय? ज्येष्ठ नागरिकांना मिळणाऱ्या १२,५०० रुपयांच्या रीबेटमुळे त्यांच्या करमुक्त उत्पन्नाची मर्यादा ५,१२,५०० रुपयांपर्यंत वाढते का, याबाबत माहिती द्यावी ही विनंती. एक वाचक ईपीएफओकडून मिळणारे पेन्शन हे प्रमाणित वजावटीसाठी पात्र असते. कलम ८७ ए अंतर्गत मिळणारी १२,५०० रुपयांची वजावट ही कराच्या रकमेपोटी आहे, उत्पन्नाच्या नाही. त्यामुळे कलम ८७एची वजावट लक्षात घेता सर्व नैसर्गिक करदात्यांसाठी करमुक्त निव्वळ उत्पन्न (नेट टॅक्सेबल इन्कम) मर्यादा पाच लाख रुपये आहे. ३ मी २००८मध्ये ८० लाख रुपयांना एक फ्लॅट विकत घेतला होता. चालू आर्थिक वर्षात मी हा फ्लॅट दोन कोटी रुपयांना विकला. या व्यवहारात मला झालेल्या भांडवली नफ्याची मोजणी कशी करावी? करबचतीसाठी ही रक्कम सीजीएएसमध्ये गुंतवण्याचा माझा विचार आहे. परंतु यामध्ये विक्रीतून मिळालेली पूर्ण रक्कम व इंडेक्सेशननंतर येत असलेली रक्कम यातील कोणती रक्कम गुंतवावी हे कृपया सांगावे. एक वाचक तुम्ही हा फ्लॅट आर्थिक वर्ष २००७-०८मध्ये केला आहे असे गृहीत धरल्यास त्याची आर्थिक वर्ष २०१९-२०साठी निर्देशांकित किंमत १,७९,२२,४८१ रुपये येते. विक्री किंमतीतून ही किंमत वजा केल्यास तुम्हाला २०,७७,५१९ रुपये दीर्घकालीन भांडवली नफा झाला आहे. सीजीएसमध्ये बचतीसाठी तुम्ही रक्कम गुंतवणार असल्यास हा दीर्घकालीन नफा गुंतवणे आवश्यक आहे. परंतु लक्षात ठेवावे, प्राप्तिकर कायद्याच्या कलम ५४ अंतर्गत तुम्ही नवीन घर खरेदी करणार असाल तर विक्रीच्या तारखेपासून पुढील दोन वर्षांत किंवा बांधकाम करणार असल्यास तीन वर्षांत सीजीएसमध्ये गुंतवलेली रक्कम वापरणे गरजेचे आहे.
मोबाइल अॅप डाउनलोड करा आणि राहा अपडेट