मुंबईच्या पूर्व उपनगरातील एका सहकारी गृहनिर्माण संस्थेचा मी सदस्य आहे. कृपया मला सहयोगी सदस्याचे (associated member) अधिकार काय व सहयोगी सभासद म्हणून कोणाची नेमणूक करता येते, तसेच सहयोगी सभासदाचे नाव घराच्या पावतीवर व शेअर सर्टिफिकेटवर लिहिता येते अथवा नाही, याबाबत कृपया मार्गदर्शन करावे.
-अ. पू. वालावलकर, चेंबूर
उत्तर
सदनिकेच्या मालकीशी संबंधित कागदपत्रांवर ज्याचे नाव प्रथम आहे, अशा सभासदाला बहाल असतात तसेच अधिकार सहयोगी सभासदालाही असतात. मात्र ज्याचे नाव प्रथम नमूद आहे, त्या व्यक्तीला सर्वसाधारण सभेस उपस्थित राहण्याचे तसेच मतदान करण्याचे अधिकार असतात. अशा सभासदाचा निवडणूक लढवण्यावरही प्राधान्याने अधिकार असतो. असे असले, तरी जर प्रथम नाव असलेल्या व्यक्तीला जर कामकाजात सहभागी होण्यात रस नसेल, अथवा वेळ नसेल, तर मग सहयोगी सभासद हा मुख्य सभासदास असलेले सर्व अधिकार अंमलात आणू शकतो. मुख्य सभासदाने आपल्याऐवजी कोण सहयोगी सभासद म्हणून हे अधिकार वापरेल याची माहिती देणे गरजेचे आहे. अशा सहयोगी सभासदाचे नाव शेअर सर्टिफिकेटवर तसेच सोसायटीच्या कामकाजाच्या नोंदींत नमूद केले जाऊ शकते.
‘हाउसिंग सोसायटी’ सदरासाठी प्रश्न
‘हाउसिंग सोसायटी’ सदरासाठी प्रश्न पाठवताना आपल्या सहकारी गृहनिर्माण संस्थेतील इमारतींची संख्या, मजले, सदनिकांची संख्या, सदनिकांचे चटईक्षेत्र, प्रश्नाचे नेमके स्वरूप इत्यादी आवश्यक तो तपशील न चुकता नमूद करावा. मजकूर शक्य तो टाइप केलेला, अन्यथा किमान सुवाच्य हस्ताक्षरांत असावा. पाकिटावर ‘हाउसिंग सोसायटी सदरासाठी’ असे स्पष्ट लिहावे. प्रश्न पोस्टाने किंवा कुरियरने पुढील पत्त्यावर पाठवावेतः महाराष्ट्र टाइम्स, टाइम्स टॉवर, ४ था मजला, कमला मिल्स कम्पाउन्ड, लोअर परळ, मुंबई- ४०० ०१३.
मोबाइल अॅप डाउनलोड करा आणि राहा अपडेट