मुंबईच्या पूर्व उपनगरातील विक्रोळी पूर्व येथील कन्नमवार नगर म्हाडा वसाहतीत आमची नोंदणीकृत गृहनिर्माण संस्था आहे. इमारतीस 'ए' आणि 'बी' अशा दोन विंग असून जॉइंट इमारत आहे. तळमजला अधिक चार मजले अशी पाच मजल्यांची इमारत असून प्रत्येक मजल्यावर आठ खोल्या याप्रमाणे एकूण एका विंगच्या चाळीस (४०) खोल्या आहेत. ए आणि बी विंगच्या मिळून एकूण ८० खोल्या इमारतीत आहेत. प्रत्येक खोलीचे क्षेत्रफळ २२६ चौरस फूट (२१.९९ चौरस मीटर) इतके आहे. इमारतीचा कार्पेट एरिया १७९३६ चौरस फूट (१६६६.२५ चौरस मीटर) इतका आहे. शिवाय सोसायटीकडे अतिरिक्त क्षेत्रफळ २६३.८८ चौरस मीटर इतके आहे. इमारतीच्या पूर्वेस २५ फुटांचा आंतररस्ता आहे. इमारतीच्या पश्चिमेस राष्ट्रीय महामार्ग आहे. इमारतीच्या उत्तर आणि दक्षिण बाजूस म्हाडाच्या इमारती आहेत. आमची इमारत ऑक्टोबर १९९३ साली कन्व्हेअन्स झाली आहे. आमचा पुनर्विकास करावयाचा विचार आहे. जर आम्ही स्वयंपुनर्विकास करावयाचे ठरवले, तर त्याकरता किती टक्के गाळेधारकांची सहमती लागेल? तसेच उपरोक्त जागेबद्दल प्रत्येक सदनिकाधारकास सरकारी नियमाप्रमाणे किती चौरस फूट जागा मिळू शकेल? पुनर्विकास फायद्याच्या दृष्टीने स्वयं करावा की विकासकाकडून करावा याबद्दल मार्गदर्शन करावे ही विनंती.
उत्तर:
कन्न्मवार नगर ही म्हाडा वसाहत असल्याने आपल्याला भरपूर चटईक्षेत्र निर्देशांक मिळू शकतो. या सर्व चटईक्षेत्र निर्देशांकाचा वापर आपण स्वयंपुनर्विकास केल्यास आपण पुरेपूर करू शकता व आपल्याला निश्चितच अधिक फायदा मिळू शकतो. स्वयंपुनर्विकासात बिल्डर देतो त्यापेक्षा अधिक चटईक्षेत्र, बिल्डर करून देतो त्यापेक्षा अधिक उत्तम बांधकाम व बिल्डर देतो त्यापेक्षा अधिक कॉर्पस निधी या सर्व गोष्टी आपणास मिळू शकतात. तसेच बिल्डरला मुखत्यारपत्र द्यावे लागते ते स्वयंविकासात नाही. आपण बिल्डरकडे गेलात, तर आपले भरपूर नुकसान होईल. कन्नमवार नगरमध्ये अनेक इमारती बिल्डरकडे गेल्या, बिल्डरने त्या जमीनदोस्त केल्या, आज नागरिकांना भाडेही बिल्डर देत नाहीत व लोक अक्षरश: रस्त्यावर आले आहेत. कन्नमवार नगरमध्ये शेकडो लोकांची सपशेल फसवणूक बिल्डरांनी केलेली असल्याने पुन्हा त्याच मार्गाने जाणे किती धोक्याचे आहे हे आपल्या लक्षात आलेच असेल. त्यमुळे असा धोका न पत्करता स्वयंपुनर्विकास करणे हाच उत्तम मार्ग आहे. आपण तसे केलेत तर आपल्याला ७०० ते ८०० चौरस फूट कार्पेट एरियादेखील मिळू शकेल. बिल्डर मात्र ५०० चोरस फुटांच्या वर जागा देत नाही. या सर्वाचा विचार करून योग्य तो निर्णय घ्यावा.
मोबाइल अॅप डाउनलोड करा आणि राहा अपडेट