पैसा झाला मोठा एक लाखांपर्यंतचा भांडवली नफा करमुक्त सीए प्रफुल्ल छाजेड माझी मुलगी गेल्या महिन्यात ऑस्ट्रेलियात स्थायिक झाली आहे. येथील काही बँकांमध्ये तिची बचत खाती असून ही खाती ती आता तिच्या एनआरओ खात्यांमध्ये हस्तांतरित करू इच्छिते. मात्र ही प्रक्रिया ऑनलाइन करण्यात सध्या तरी अडचणी येत आहेत. चालू आर्थिक वर्षाचे प्राप्तिकर विवरणपत्र भरताना तिच्या बँक खात्यांना एनआरओचे स्टेटस दाखवून चालेल का? तसेच, तिच्या मुदत ठेवींवरील टीडीएसमधील फरक (३०-१०=२० टक्के) अग्रीम कर (अॅडव्हान्स्ड टॅक्स) म्हणून भरता येईल का? कृपया मार्गदर्शन करावे. एक वाचक प्राप्तिकर कायद्याप्रमाणे तुमची मुलगी एनआरओ असेल तर बँकेला तुम्ही तसे कळवणे गरजेचे आहे व त्यानुसार टीडीएस कापणे हे बँकेचे कर्तव्य आहे. बँकेने टीडीएस कापल्यानंतरही काही कर देय असेल तर तो तुम्ही अग्रीम कर म्हणून भरू शकता. माझ्या आईचे वय ६५ असून तिने तिच्या नावे असलेल्या काही शेअर्सची (तीन वर्षांहून अधिक मुदतीचे) १,११,१४६ रुपयांना विक्री केली आहे. या शेअर्सची खरेदी किंमत ४६,१९२ रुपये होती. या व्यवहारावर ११४ रुपये एसटीटी भरला आहे. याशिवाय, टपाल खात्यात ठेवलेल्या पाच वर्षांच्या मुदत ठेवींवरील वार्षिक व्याजापोटी तिला २९,२३२ रुपये मिळाले आहेत. तसेच, एका खासगी बँकेतील मुदत ठेवींवरील व्याजापोटी तिला वार्षिक ४२,८०४ रुपये उत्पन्न झाले आहे. ही आकडेवारी पहाता चालू आर्थिक वर्षात तिचे उत्पन्न करपात्र मानले जाईल का, हे कृपया सांगावे. एक वाचक प्रस्तुत माहितीवरून शेअर्समधील व्यवहारातून तुमच्या आईला एसटीटी वजा जाता ६४,८४० रुपये दीर्घकालीन भांडवली नफा झाला आहे. ही रक्कम एक लाख रुपयांपेक्षा कमी असल्याने प्राप्तिकर कायद्याच्या कलम ११२ए अंतर्गत ती करमुक्त राहील. त्यांचे इतर उत्पन्न ७२,०३६ येत असून हे उत्पन्नही त्यांना लागू असलेल्या करमाफ उत्पन्नाच्या मर्यादेपेक्षा कमी असल्याने त्यावरही कर आकारला जाणार नाही. मी पुणे इथे २७ लाख ७६ हजार रुपयांना एक वन बीएचके फ्लॅट फेब्रुवारी २०१७मध्ये बुक केला आहे. जीएसटी लागू होण्यापूर्वी या फ्लॅटसाठी मी तीन लाख रुपये भरले आहेत व जीएसटीची अंमलबजावणी सुरू झाल्यानंतर उर्वरित पेमेंट मी गृहकर्जाद्वारे केले आहे. फ्लॅटचे पूर्ण पेमेंट मी फेब्रुवारी २०१९पर्यंत पूर्ण केले असून या रकमेवर मी जीएसटी भरलेला नाही. या इमारतीला पूर्णत्वाचा दाखला मिळालेला नाही. माझा हा फ्लॅट पंतप्रधान आवास योजनेंतर्गत पात्र आहे. तरी या खरेदीवर मला किती जीएसटी भरावा लागेल, याविषयी कृपया मार्गदर्शन करावे ही विनंती. एक वाचक पूर्णत्वाचा दाखला न मिळालेल्या इमारतींतील घरांवर जीएसटी लागू होतो. हा कर फ्लॅट खरेदी करणाऱ्याला बिल्डरकडे जमा करावा लागतो. काही बिल्डर फ्लॅटच्या किमतीमध्येच जीएसटी समाविष्ट करून व्यवहार करतात. तुमच्या बाबतीत बिल्डर व तुमच्यात कशाप्रकारे करार झाला आहे ते पाहून तुम्हाला कर भरावा लागेल की नाही हे निश्चित करता येईल. फ्लॅटखरेदीसंबंधी सर्व कागदपत्रे सीएसारख्या तज्ज्ञ व्यक्तीला दाखवून त्यांचा सल्ला घ्यावा.
मोबाइल अॅप डाउनलोड करा आणि राहा अपडेट