आईवडील दोघांचेही १९८९पूर्वी निधन झाले असून दोघांनी इच्छापत्र केलेले नाही. सदर प्रकरणात मालमत्ता संदर्भात निर्णय घेताना मुलीचा ( विवाहित किंवा अविवाहित) हक्क विचारात घेतला जातो का? मुलीला हक्क मागण्याचा अधिकार असतो का?
उत्तर
हिंदू वारसाहक्क (दुरुस्ती ) कायदा २००५ अस्तित्वात येण्याआधी कायद्यातील तरतुदीनुसार संयुक्त हिंदू कुटुंबात जन्मलेला केवळ पुरुषच आपोआप सहवारस अथवा समान उत्तराधिकारी मानला जायचा आणि त्यायोगे त्याला पूर्वजांच्या मालमत्तेत हिस्सा प्राप्त व्हायचा. मुलीला तसा कोणताही अधिकार नव्हता. ही परिस्थिती दुरुस्ती कायद्यामुळे बदलली असून आता मुलगा आणि मुलगी दोघांनाही समान अधिकार आहेत. तथापि, हा कायदा येण्यापूर्वी (२० डिसेंबर २००४ पूर्वी)पूर्णत्वास गेलेल्या व्यवहारांना लागू होत नाही. त्यामुळे तुमच्या प्रकरणात मुलीला पूर्वजांच्या मालमत्तेत कोणताही हिस्सा मिळणार नाही.
सदस्य सोसायटीची भिंत तोडू शकत नाही.
प्रश्न
आमच्या हाउसिंग सोसायटीमध्ये १० सदनिकाधारक आणि ४ गाळेधारक आहेत. बिल्डिंगच्या खाली दोन चारचाकी व १० दुचाकी राहतील एवढी जागा आहे. एका सदस्याने त्याची चारचाकी ठेवण्यासाठी सोसायटीची संरक्षण भिंत कोणालाही न विचारता पाडली आणि स्वतःच्या गाडीसाठी सोसायटीच्या जागेत शेड बांधत आहे. अशा वेळी काय करावे?
उत्तर
सदस्याची कृती स्पष्टपणे बेकायदा असून सोसायटीने कडक कारवाई करण्याची गरज आहे. कोणताही सदस्य सोसायटीची भिंत तोडून स्वतःच्या गाडीच्या पार्किंगसाठी शेड बांधू शकत नाही. सोसायटीचे पदाधिकारी मौन बाळगून त्याला पाठिंबा देत आहेत, हे असे दिसते. अन्यथा, त्याने जे केले ते करण्याची त्याची हिम्मत झाली नसती. या सदस्याला ती शेड पाडण्यास भाग पाडायला लावायला हवे आणि स्वखर्चाने सोसायटीची भिंत बांधून द्यायला लावायला हवे. सदस्यांनी पदाधिकाऱ्यांना या विषयावर चर्चा करण्यासाठी विशेष सर्वसाधारण बैठक बोलावण्यास भाग पाडले पाहिजे.
‘हाऊसिंग सोसायटी’ सदरासाठी प्रश्न
‘हाऊसिंग सोसायटी’ सदरासाठी प्रश्न पाठवताना आपल्या सहकारी गृहनिर्माण संस्थेतील इमारतींची संख्या, मजले, सदनिकांची संख्या, सदनिकांचे चटईक्षेत्र, प्रश्नाचे नेमके स्वरूप इत्यादी आवश्यक तो तपशील न चुकता नमूद करावा. मजकूर शक्य तो टाइप केलेला, अन्यथा किमान सुवाच्य हस्ताक्षरांत असावा. पाकिटावर ‘हाऊसिंग सोसायटी सदरासाठी’ असे स्पष्ट लिहावे. प्रश्न पोस्टाने किंवा कुरियरने पुढील पत्त्यावर पाठवावेतः महाराष्ट्र टाइम्स, टाइम्स टॉवर, ४ था मजला, कमला मिल्स कम्पाउन्ड, लोअर परळ, मुंबई- ४०० ०१३. आपण आपले प्रश्न mtaskquestions@gmail.com या ईमेलवरही पाठवू शकता.
मोबाइल अॅप डाउनलोड करा आणि राहा अपडेट