मी नाशिकमध्ये २०१६ मध्ये एक फ्लॅट घेतला, परंतु तो घेताना फक्त माझ्या एकट्याच्याच नावावर अग्रीमेंट केले आहे. अद्याप खरेदी खत झालेले नाही. आता मला माझ्या पत्नीचे नाव खरेदीखतात सामील करता येयील का? किंवा तिचे नाव वारस म्हणून कसे लावता येईल?
- मदन हळदे
उत्तर
तुमचा फ्लॅट जेथे आहे, ती मालमत्ता सहकारी सोसायटी म्हणून नोंदली गेली की नाही हे तुम्ही स्पष्ट केलेले नाही. जर सोसायटी नोंदली गेलेली असेल तर तुम्ही तुमच्या पत्नीचे नाव सहयोगी सदस्य म्हणून सहजपणे जोडू शकता. किंवा तिच्या नावे नामांकन (nomination) म्हणून नोंदणी करू शकता. सोसायटी स्थापन झाली नसली तरीही तुम्ही भेट कराराद्वारे तिला प्रेम आणि आत्मीयतेपोटी फ्लॅटमध्ये हिस्सा देऊ शकता. तुमची इच्छा असेल तर तिला इच्छापत्राद्वारे फ्लॅट तिला देऊ शकता. थोडक्यात, सदर फ्लॅटवरील हक्क, अधिकार आणि मालकी तुमच्या पत्नीच्या नावे करण्याचे अनेक मार्ग आहेत.
सोसायटी वार्षिक २१ टक्क्यांपर्यंत व्याज लागू करू शकते.
प्रश्न
मी कळवा जागृती सोसायटीत १८ वर्षांपासून राहत आहे. देखभाल शुल्क दरमहा वेळेवर भरत आलो आहे. २०१४ साली मी अमेरिकेला गेलो असतांना सर्वसाधारण सभेत इमारत नूतनीकरण निधीपोटी प्रत्येकाने पाच हजार रुपये द्यावे असे ठरले. मी २वर्षे ५-५ हजार दिले. मी टेरेस मधूनगळती , पाणी पुरवठ्याच्या गंभीर समस्या इ. विषयी पत्र देऊन गेल्या वर्षापासून पाच हजार रुपये दिलेले नाहीत. दर महिन्याला नियमित देखभाल शुल्क भरत आहेच. कमिटीच्या गैरकारभारामुळे सध्या प्रशासक आलेला आहे. त्याने मला (इतरांप्रमाणे) नोटीस पाठविली आहे की मला कलम १०१ खाली नोटीस येऊन कायदेशीर कारवाई होईल. तसेच मी ₹ ५००० व्याजासह न भरल्यास काही दिवसांतच होऊ घातलेल्या निवडणूकीसाठी अपात्र होईन. माजी खजीनदाराने सर्वसाधरण सभेच्या संमतीशिवाय आपल्या मर्जीने १८% व्याज लावायला सुरुवात केली आहे. दरमाह चे देखभाल शुल्क जसे आदर्श उपविधीनुसार बंधनकारक असतात, तसेच वरीलप्रमाणे पाच हजार रुपये इमारत नूतनीकरण निधी आदर्श उपविधीनुसार बंधनकारक असतात का? वरील फंडास कोणतीही परवानगी घेतलेली नसतांना तो कलम १०१ खाली येतो का ? निवडणुकीसाठी अपात्र होऊ शकतो का ?
- प्रमोद शाह
उत्तर
तुमच्या प्रश्नावरून स्पष्ट दिसते आहे, की सोसायटीने सर्वसाधारण सभेत प्रत्येक सदस्याकडून इमारत नूतनीकरण निधीपोटी वार्षिक पाच हजार रुपये आकारण्याचा ठराव संमत केला आहे. तुम्ही या ठरावाला कोणत्याही पातळीवर आव्हान दिले नाही, उलट गेल्या वर्षीपर्यंत ही रक्कम भरलीही आहे. त्यामुळे हा ठराव तुमच्यावर बंधनकारक आहे. तुमच्या टेरेसमधून होणाऱ्या गळतीचा प्रश्न सोसायटी सोडवत नाही म्हणून तुम्ही रक्कम भरण्याचे थांबवू शकत नाही. तो विषय वेगळा आहे आणि तो स्वतंत्रपणे त्या पातळीवरच सोडवला पाहिजे. सोसायटीने आकारलेले १८ टक्के व्याजही भरले पाहिजे. येथे स्पष्ट करू इच्छितो, की सोसायटच्या आदर्श उपविधीनुसार सोसायटी वार्षिक २१ टक्क्यांपर्यंत साधे व्याज लागू करू शकते.
‘हाऊसिंग सोसायटी’ सदरासाठी प्रश्न
‘हाऊसिंग सोसायटी’ सदरासाठी प्रश्न पाठविताना आपल्या सहकारी गृहनिर्माण संस्थेतील इमारतींची संख्या, मजले, सदनिकांची संख्या, सदनिकांचे चटईक्षेत्र, प्रश्नाचे नेमके स्वरूप इत्यादी आवश्यक तो तपशील न चुकता नमूद करावा. मजकूर शक्य तो टाइप केलेला, अन्यथा किमान सुवाच्य हस्ताक्षरांत असावा. पाकिटावर ‘हाऊसिंग सोसायटी सदरासाठी’ असे स्पष्ट लिहावे. प्रश्न पोस्टाने किंवा कुरियरने पुढील पत्त्यावर पाठवावेतः महाराष्ट्र टाइम्स, टाइम्स टॉवर, ४ था मजला, कमला मिल्स कम्पाउन्ड, लोअर परळ, मुंबई- ४०० ०१३. आपण आपले प्रश्न mtaskquestions@gmail.com या ईमेलवरही पाठवू शकता.
मोबाइल अॅप डाउनलोड करा आणि राहा अपडेट