- टीम टाइम्स प्रॉपर्टी
फेरारी, ऑडी यासारख्या आलिशान गाड्यांमधून फिरणारे उच्चभ्रू मुंबईकर आता लक्झरी होम्स, पेण्टहाऊसेस आणि सी-फेसिंग अपार्टमेंट्सच्या खरेदीतून काढता पाय घेत आहेत. काहींनी आपली जुनी घरं आणि अपार्टमेंट्स न विकण्याचा तर काहींनी विक्री पुढे ढकलण्याचा निर्णय घेतला आहे. बिघडलेली आर्थिक स्थिती आणि ढासळलेलं रिअल इस्टेट मार्केट ही यामागची कारणं असून याचा फटका आपल्याला बसू नये यासाठी हा वर्ग प्रयत्नशील आहे.
या परिस्थितीचा परिणाम थेट लक्झरी होम्स विक्रीवर झाला आहे. १० कोटीच्या आसपास किमती असणाऱ्या मुंबई शहरातल्या आलिशान अपार्टमेंट्सच्या विक्रीत लक्षणीय घट झाली आहे. मुंबईतलं वाळकेश्वर, मलबार हिल, नेपियन्सी रोड, कुलाबा, कफ परेड, चर्चगेट, ब्रीच कॅण्डी, पेडर रोड, अल्टामाऊंट रोड आणि कारमायकल रोड अशा उच्चभ्रू भागात ही घट झालेली पाहायला मिळते. त्याचप्रमाणे नव्याने विकसित होऊ घातलेल्या वरळी आणि वांद्रा-कुर्ला कॉम्प्लेक्ससारख्या भागांनाही रिअल इस्टेट मार्केटमधल्या कठीण परिस्थितीचा फटका बसत आहे.
सध्याची असलेली आर्थिक अस्थिरता, घरांचा अतिरिक्त पुरवठा आणि दिवसेंदिवस गगनाला भिडणाऱ्या घरांच्या किमती या सर्वांचा एकत्रित परिणाम लोकांच्या खरेदी क्षमतेवर झाला असल्याचं तज्ज्ञांचं मत आहे.
घरांच्या ग्राहकांची संख्या कमी आणि जुन्या घरांची विक्रीदेखील मंदावल्याने घरांच्या विक्रीत वाढ होत नसल्याचं तसंच बिघडलेल्या आर्थिक परिस्थितीमुळे गुंतवणुकदारांनीदेखील गृहखरेदीकडे पाठ फिरवली असल्याचं मत तज्ज्ञांनी व्यक्त केलं आहे. घर विकत घेणाऱ्या खरेदीदारांचे गुंतवणुकदार आणि ग्राहक या दोन प्रकारात वर्गीकरण केलं जातं. सध्या रिअल इस्टेट मार्केटमध्ये २५ ते ३० टक्के हे गुंतवणूकदार तर १० ते १२ टक्के ग्राहक आहेत.
मार्केटमधल्या जाणकारांच्या मते घरांची मागणी कमी झाली असली तरी भविष्यात ही परि‌स्थिती सुधारेल.
असं असलं तरीही गुंतवणुकदारांची संख्या वाढत असून घरांच्या किमतीदेखील कमी होण्याची लक्षणं दिसत नाहीत. एकट्या मुंबईत १० कोटी किमतीची सुमारे १००० ते १५०० घरं विकली गेली आहेत. कमी परतावा आणि घरांचा अतिरिक्त पुरवठा यामुळे गुंतवणूकदार गुंतवणूक करत नाहीत असं मत नाइट फ्रँकचे कार्यकारी संचालक गुलाम एम. झिया यांनी व्यक्त केलं.
मोबाइल अॅप डाउनलोड करा आणि राहा अपडेट