मी एक ज्येष्ठ नागरिक असून निवृत्तीवेतन व बँकेतून मिळणारे व्याज ही माझ्या उत्पन्नाची साधने आहेत. मला १० व सहा वर्षांचे दोन नातू असून त्यांना मी काही रक्कम बक्षीस देऊ इच्छितो. या बक्षीस रकमेवर कर (गिफ्ट टॅक्स) आकारला जाऊ नये यासाठी या माध्यमातून मी जास्तीत जास्त किती रक्कम मी त्यांना देऊ शकेन? बक्षीस दिलेली ही रक्कम बँकेत मुदत ठेव म्हणून ठेवली तर त्यावर मिळणाऱ्या व्याजावर कर आकारला जाईल का, यावर कृपया मार्गदर्शन करावे.
एक वाचक
तुम्ही तुमच्या नातवंडांना कितीही रक्कम बक्षीस म्हणून देऊ शकता. त्यावर त्यांच्या आईवडिलांना कोणत्याही प्रकारे प्राप्तिकर लागू होणार नाही. मात्र बक्षीसापोटीची ही रक्कम बँकेत मुदत ठेव म्हणून ठेवली तर त्यावरील व्याज हे करपात्र ठरेल. या व्याजाचे उत्पन्न या मुलांचे पालक, (आई व वडील) ज्यांचे उत्पन्न अधिक असेल त्याच्या/तिच्या उत्पन्नात समाविष्ट होऊन कर आकारला जाईल.
मी एक ज्येष्ठ नागरिक असून गेल्या महिन्यात (ऑगस्ट २०१८) मी एका बँकेत मुदत ठेवींत पैसे गुंतवले आहेत. या ठेवींवर मला मुदतीअंती याच आर्थिक वर्षात ४२ हजार रुपये व्याज मिळणार आहे. या व्याजाव्यतिरिक्त माझे अन्य कोणतेही उत्पन्न नाही. तरी, या व्याजापोटी टीडीएस कापला जाऊ नये यासाठी मी १५एच हा अर्ज कधी भरून देणे आवश्यक आहे, ते कृपया सांगावे.
एक वाचक
१५जी व १५एच हे अर्ज दरवर्षी आर्थिक वर्षाच्या सुरुवातीला तसेच, जेव्हा गुंतवणूक केली जाते तेव्हा भरून देणे आवश्यक असते. त्यामुळे तुम्ही जेव्हा मुदत ठेवीत पैसे ठेवले त्यावेळी १५एच हा अर्ज भरून देणे आवश्यक आहे. यानंतर पुढील आर्थिक वर्षासाठी एप्रिल २०१९मध्ये या मुदत ठेवीवरील करमाफीसाठी पुन्हा १५एच भरून द्यावा लागेल.
मी सेवानिवृत्त कर्मचारी असून माझे वय ७५ आहे. चालू आर्थिक वर्षात माझे वार्षिक उत्पन्न पुढीलप्रमाणे आहे. सेवानिवृत्ती वेतन २,६४,०००/- बँक व पोस्टातील मुदतठेवींवरील वार्षिक व्याज ६०,०००/- आणि बँक व पोस्टातील बचत खात्यांवरील व्याज ३६,०००/- तसेच, गॅस अनुदानापोटीची अंदाजे रक्कम दोन हजार रुपये आहे. या व्यतिरिक्त माझी अन्य कोणतीही गुंतवणूक नाही. तरी, या उत्पन्नावर किती प्राप्तिकर लागू होईल, हे कृपया सांगावे.
सुरेश गुरव, महाड
तुम्ही दिलेल्या माहितीवरून तुमचे एकूण उत्पन्न ३,६०,००० होत आहे. त्यामधून पेन्शनपोटी ४० हजार रुपयांची वजावट व कलम ८०टीटीबी अंतर्गत ५० हजार रुपयांची वजावट ग्राह्य धरली तर तुमचे करपात्र उत्पन्न हे २,७०,००० रुपये ठरते. ज्येष्ठ नागरिकांना लागू असलेली करमुक्त उत्पन्नाची मर्यादी तीन लाख रुपये आहे. त्यामुळे तुम्हाला प्राप्तिकर लागू होणार नाही.
मोबाइल अॅप डाउनलोड करा आणि राहा अपडेट