फर्निचर खरेदी करून घर सजवण्याचा नुसता विचारच उत्साह देणारा असतो; पण म्हणून ही खरेदी काही सोपी नसते. फर्निचरची खरेदी करताना काही गोष्टी प्रामुख्याने विचारात घ्याव्या लागतात.
घराचं रिनोव्हेशन करताय की नव्याने फर्निचर खरेदी करताय हे लक्षात घेऊन मग नेमकं कोणतं फर्निचर लागणार आहे याची यादी करा. त्यातही प्रमुख गोष्टींचा विचार आधी करा.
प्रत्येकजण बजेटचा विचार करून खरेदी करायला जात असला, तरी फर्निचर घेण्याआधी किमतीबद्दल पूर्ण माहिती मिळवा. अशी मोठी खरेदी करताना बरेचदा बजेटपेक्षा जास्त पैसेही अचानक लागू शकतात. तर कधी आवडलेलं फर्निचर महाग असू शकतं. म्हणूनच खरेदीला जाण्याआधी नेमके किती पैसे वाढले तरी ते आपल्याला परवडेल याचा आकडा मनात असणं महत्त्वाचं आहे.
बजेट ठरवतानाच फर्निचरचं मटेरिअलही निश्चित करा. अशाने ऐनवेळी गोंधळ होणार नाही.
रेडिमेड फर्निचर खरेदी करताना लांबीरूंदीची मोजमापं नीट लिहून घ्या. एखाद-दुसऱ्या इंचाने माप चुकलं, तरी मोठा घोळ होऊ शकतो.
फर्निचर निश्चित करताना त्याच्या देखभालीच्या खर्चाविषयीही जाणून घ्या. काही फर्निचर ठराविक काळानंतर पॉलिश करावी लागतात. त्या खर्चाची तयारी आहे का याचा विचार करून मगच खरेदी करा.
फर्निचर किती शानदार आहे यापेक्षा ते किती उपयुक्त आहे याचा विचार करा. बरेचदा हौसेपोटी अवाढव्य, उपलब्ध जागेत न बसणारं फर्निचर विकत घेतलं जातं. ते टाळा. शोरूममध्ये तिथल्या प्रकाशयोजनेमुळे उठून दिसणारं फर्निचर घरात, तिथल्या प्रकाशात चांगलं दिसेल का याचाही विचार करा.
साठवणीसाठी किती जागा लागेल, त्यासाठी शोकेस, कपाटं अशा फर्निचरमध्ये किती कप्पे हवेत, ते ड्रॉवर्स हवेत की दरवाजा असलेले, हँडल्स, टोकदार कडा अशा बारीकसारीक गोष्टींचाही विचार करा आणि गरजेप्रमाणे बदल करून घ्या.
जुनं फर्निचर कायम ठेवणार असाल, तर नव्या फर्निचरसोबत त्याचा कसा मेळ घालता येईल हे पाहा. त्यासाठी जुन्या फर्निचरचं पॉलिशिंग किंवा नव्याप्रमाणे त्याचा रंग बदलणं अशा गोष्टीही विचारात घ्या.
फर्निचर करताना कधीही भविष्यातल्या गरजांचा प्रामुख्याने विचार करावा. उदा. नजिकच्या काळात तुम्ही घर बदलणार आहात का, नोकरीच्या निमित्ताने बाहेरगावी जाणार आहात का, घर भाड्याने देणार आहात का, घरात लहान मूल किंवा आई- वडील राहायला येणार आहेत का वगैरे गोष्टींचा विचार करून नियोजन करा.
सर्वात महत्त्वाचं म्हणजे फर्निचर खरेदीचा आनंद घ्या. फर्निचर खरेदी म्हणजे सतरा ठिकाणी फिरणं, आवडी-निवडीवरून उडणारे खटके, क्वचित होणारं नुकसान किंवा मनस्ताप, अनपेक्षितपणे मिळालेला एखादा चांगला पीस किंवा सवलत असं सगळंच आलं. या सगळ्याचा मनापासून आनंद घ्या.
मोबाइल अॅप डाउनलोड करा आणि राहा अपडेट