नव्या इमारतीतलं नवंकोरं घर घ्यावं की रिसेलमधलं, या प्रश्नाचं उत्तर देणं सोपं नाही. अनेक लोक अनेक कारणांमुळे नव्याऐवजी रिसेलमधलं घर घेणं पसंत करतात. बरेचदा विशिष्ट भागात लोकांना हवं असणारं नवं घर उपलब्ध नसतं म्हणून ते रिसेलच्या घराकडे वळतात.
काही वेळा त्यांचा प्रॉपर्टी मार्केटचा अभ्यास कमी पडतो, तर काही वेळा त्यांना चांगले गृहप्रकल्प उपलब्ध आहेत, याची माहितीच नसते. काही व्यवहारांमध्ये ग्राहक प्रॉपर्टी एजण्टाच्या आग्रहाला बळी पडतात आणि चांगल्या ठिकाणी त्यांच्या बजेटमध्ये बसणारी घरं उपलब्ध असूनही रिसेलचं घर खरेदी करतात. तर काही ग्राहकांना असं वाटतं की नव्या
घराच्या किमतीच्या तुलनेत कमी किमतीत मिळणारं रिसेलचं घर हे नेहमीच फायद्याचं असतं.
रिसेलचं घरं घेणाऱ्या बहुतांश ग्राहकांना घर खरेदीची आणि तात्काळ ताबा मिळवण्याची घाई झालेली असते. ही घाई बरेचदा एवढी तीव्र असते की, काही महिन्यांतच एखादा गृहप्रकल्प तयार होऊन त्यातल्या घरांचा ताबा मिळणार असला तरी ती घरं घेण्यासही ग्राहक इच्छुक नसतात.
अनेक लोक नवं घर घेतात आणि काही वर्षांनी त्यांना अपग्रेड व्हायचं असतं. त्यामुळे ते जुनं घर विकून नवं घर घेण्याचा निर्णय घेतात. त्यामुळे रिसेल घरांचं खूप मोठं मार्केट तयार झालं आहे. याचा अर्थ असा अजिबात नाही की, नव्या आणि रिसेल घरांचं मार्केट समान असून त्याचं मूल्यही समान आहे. त्यामुळे ग्राहकांना त्यांच्या आवडत्या लोकेशनला नव्या आणि रिसेल घरांचे दोन्ही पर्याय उपलब्ध होतात आणि त्यांचे फायदे ग्राहकांना मिळू शकतात, हे अधिक महत्त्वाचं.
> घर ही एक अशी संपत्ती आहे, जी नवी असो की जुनी असो ती राहण्यासाठी उपयोगी पडते. निवाऱ्याच्या दृष्टिकोनातून पाहिलं तर तिच्या मूल्यात आणि अनुभवात काहीच फरक पडत नाही. घर आणि कार जुनी असो वा नवीन, तिचा वापर एक किंवा अनेकजणांकडून होतोच. त्यात एकच मुद्दा असतो तो म्हणजे ती प्रॉपर्टी वापरणाऱ्यांची मानसिकता.
> चांगल्या विकासकाकडून खरेदी केलेल्या फर्स्ट सेल घरातली फिक्श्चर्स आणि फिटिंग्ज या नव्या असतात. परंतु रिसेल घरातली फिक्श्चर्स आणि फिटिंग्ज जुनी असल्याने ती केव्हाही खराब होऊ शकतात. अर्थात जुन्या वस्तू लवकर खराब होतात आणि नव्या वस्तू तुलनेने उशीरा खराब होतात, हा नियम घरातल्या फिटिंग्जलाही लागू होतो.
> चांगल्या विकासकाकडून फर्स्ट सेलचं घर घेतलं तर त्याचे काही फायदे असतात. अशा गृहप्रकल्प आणि घरांमध्ये ऊर्जेचा अधिकाधिक वापर केलेला असतो. इमारत पर्यावरणपूरक असते. सामायिक सेवासुविधा अधिक ऐसपैस, वापरण्यास सहज आणि सुटसुटीत असतात. चांगले विकासक हे डॉक्टरांसारखे असतात. ते नेहमी आपलं ज्ञान, तंत्र आणि साधनं अद्ययावत करत असतात. कारण त्यांना नव्या ग्राहकांच्या आवडी-निवडी आणि गरजा पूर्ण करून स्पर्धेत टिकायचं असतं. विकासकांच्या या मानसिकतेचा थेट फायदा ग्राहकांना होतो.
> रिसेलच्या घरात पूर्वीच्या मालकाने केलेल्या काही गोष्टी नक्कीच असतात. त्यात त्याचं व्यक्तिमत्व किंवा संस्कृतीचा भाग असू शकतो. त्या गोष्टींमुळे भिंतीला पडलेली छिद्रं बुजवून घराला नवा रंग देणं थोडंसं अवघड असू शकतं, पण अशक्य नसतं. पण घराची रचनाच बदलून मोठे बदल करणं आव्हानात्मक असतं.
> बांधकाम सुरू असलेल्या किंवा तयार झालेल्या नव्या घरात राहायला जाणं हे जुन्या घरात राहायला जाण्यापेक्षा फारच कमी खर्चिक असतं. बांधकाम अपूर्ण असणाऱ्या प्रोजेक्टच्या कामाचे टप्पे जसे पूर्ण होतात तशा त्यातल्या घरांच्या किमतीही वाढतात. परंतु रिसेल घरांची किंमत नव्या घरांसारखी वाढत नाही.
> नव्या घराची किंमत आणि आयुष्य हे रिसेल घरांपेक्षा जास्त असतं.
घर खरेदीचा निर्णय हा कधीच घाई-गडबडीत घ्यायचा नसतो. नवं घर हे रिसेल घरापेक्षा थोडंसं स्वस्त असलं किंवा थोडं महाग असलं तरी केवळ बजेटचा विचार करून निर्णय घ्यायचा नसतो. प्रॉपर्टीतल्या गुंतवणुकीचे काही निर्णय हे दीर्घकालीन आर्थिक उद्दिष्ट्य आणि भविष्यकालिन फायद्यांचा विचार करूनच घ्यावे लागतात. त्यामुळे नव्या आणि रिसेलच्या घरांचे फायदे आणि तोट्यांचा विचार करूनच निर्णय घ्यायला हवा.
- टीम मटा
मोबाइल अॅप डाउनलोड करा आणि राहा अपडेट